إزاي تغسل إيديك؟  

Posted by: Chaotic pOsha


سادت حالة من الفوضى والملل في ندوة نظمتها وزارتي التربية والصحة حول موضوع انفلونزا الخنازيرحيث ارتفع صوت المتحلطمات من المعلمات الآتيات من عدة مدارس بعز الشمس للاستفادة من الندوه ومعرفة كيفية التعامل مع المرض في حالة حدوثة. فبعد الانتهاء من النشيد الوطني تساءل الحضور عن سبب مجيئهن حيث اقتصرت الندوة على "تعليم" المدرسات اتباع العادات الصحية السليمة مثل غسل الصحون بعد أكل الطعام وغسل الحمامات والملابس!!! بالإضافة إلى فيديو تعليمي يبين كيفية غسل اليدين والملفت بالفيديو استخدام اللهجة المصرية في كتابة الخطوات حيث تفاجئ الحضور بعنوان "إزاي تغسل إيديك؟" واتباعة بخطوات غسل اليدين باستخدام مصطلحات مثل "دلوقتي" و "حنعرف" فالمعلمة يجب أن تغسل يديها من جميع الجوانب ولايجب أن تنسى غسل صبع صبع كما هو موضح بالفيديو المتعوب عليه وأن تغلق صنبور المياة بعد ماتمش ايدها يعني لاترشيد ولايحزنون. هذا بالإضافة إلى فيديو تعليمي آخر يبين للمعلمات كيف يعطسن وكيف يلبسن الكمام...لا تعليق

خلوني أتحجى كويتي فصيح عشان أطلع حرتي عدل بعد اذنكم
أنا مادري شنو نظرة الوزارة لنا كمعلمات ولكن بعد اللي شفته وضحت الصورة
بالنسبة لهم المعلمة ماتعرف تتبع أبسط سبل النظافة عشان جذي مودينا ندوه فاشلة عشان حضرة الوزير والوزيرة يبرون ذمتهم ومايستجوبونهم اذا مات جم طالب بعدين ..خو احنا سوينا اللي علينا!! لا ونظامهم قصب طيب تروحون الندوة موقعين ستمية ألف توقيع حضور وانصراف. وبعدين معقولة نقعد ساعتين نسمع وحدة ماتعرف أساسيات تقديم ندوة ومعصبة وتعطي نظرات مادري ليش وبالأخير مانستفيد شي؟ أو يقولون لنا شي من البديهي ان كل انسان يعرفة؟ ياناس! ياعالم! ترا احنا ناس متعلمة ومتحضره محنا متخلفين مانعرف نغسل ايدنا! شنو هالمهزلة؟
ياوزارة التربية أي نظافة أي بطيخ أنتو من صجكم؟ نظفو المدارس أول وصفوف الطالبات
حطونا في بيئة مناسبة صدورنا راحت من الغبار والوصاخة والله احنا اللي مسكنا الفوط والديتول وقعدنا ننظف الصفوف
هذا غيض من فيض وهذي بداية العام والخافي أعظم

This entry was posted on Sunday, September 13, 2009 . You can leave a response and follow any responses to this entry through the Subscribe to: Post Comments (Atom) .

21 comments

الي صار مو تقليل من قدر فهامية المدرسات

الهدف الأساسي أن مسئولين الوزارة لا سمح الله طاح الفاس بالراس يلقون لهم حجة يتمسكون فيها

اي مو انا قلت جذي
السالفة لعبة سياسية خايفين من النواب واحنا الضحية

مضيعين وقتنا عالفاضي

السلام..

مشكلتنا انه نعاني من السطحيه والشغل اي شي ..

يعني بالاسم احنا نوديكم ندوات ودورات بس بالصج مافي فايده تذكر ..

..باختصار استخفاف بالعقول

لو معلمينكم تسون منيكير افيد :)

اتغشمر معاج..

والله يعينكم يارب..

رورو: على قولتج بالاسم بس نروح ندوات
انا اقول لا يعطونا ندوات خير شر حتى لو يسوون ندوه منكير بتصير خواره لول

يبا ناس ماتعرف شي بس همها الظاهر
والشرهه عالمعلمات اللي مو على قلب واحد وساكتين عن حقهم وعن الغلط

والله مت من الضحك على العنوان ;D
انتي عمرج شفتي وزارة الصحة تسوي ندوة عن الاكل الصحي مثلا؟ أو كيفية الوقاية ؟ وشلون الانسان يعيش مرتاح ومستانس وصحي ؟

انا عن نفسي ماشفت ،،، بس يخرعوننا بهالامراض ويضيقون خلوقنا :/

ماعليج منهم بس ماقلتي لي
إزاي تغسلي إيدك ؟ :pP

Q8 teacher:
والله انتي اللي فاهمتني صح لول
الوزارتين يستعبطون على روسنا مع دوراتهم

أنا ماعرفش أغسل إيديه لول علميني إزاي؟ هاهاها

مال كلوركس و تغسلين مخوخ هالوزارة
يالله ينفع

انتر
ماينفع كلوركس صدقتي
هذيلا يبيلهم جف لإزالة البقع الصعبة

رحت الندوة وياليت ما رحت

وزارة الصحة مساكين تعبو على تحضير الافلام لكن العيب على وزارة التربية تخطيط بلاليط

حشدو 200 معلم في مسرح الصوت رديء والشاشة مدعوسة ما تشوف فيها شي

اما طريقة الجلوس فكانت فظيعة

انا عن نفسي قعدت بالزاوية خايف!!

هذا بدال ما تقولين جزاهم الله خير
متعبين نفسهم وحاطين لكم فيديوات تعليمية كيف تعطس وكيف تمسح سنانسينك طايحة فيهم ذم

رأيي من رأي جاكوو حجة لليوم الاسود لا سمح الله

كاريكاتير: عاد أول شي قالوه بالمحاظره ان لا تروحون مكان فيه تجمعات! شالتناقض
ميمعينا قصب ويحذرونا بعد

كاريكاتير هم مدرس؟ ماهقيت والله! :))

نمول إي وايد متعبين نفسهم
على قولت كاريكاتير
لا مايكات مثل الناس وشاشه مدعوسه

كل عام وانتم بخير

تمنياتي بقضاء عيد سعيد

الله يجزيكم كل خير
هذا الدافع الوحيد للاستمرار
ولا اذا ننطر التقدير و الاعتراف من هالجهات انسي

عندنا سطحيه و شكليات في كل شي
و انعدام احترافيه في كل شي
و خصوصا في الاداره

خليها علي الله
و الله يسلم الجميع

و عيدكم مبارك
و تقبل الله طاعتكم

ما اقول الا هالايام صاير الواحد يغسل

بس يغسل ايده من هالدنيا صج!!!

لا حول ولا قوة إلا بالله ..

ولا تحرين عمرج حبيبتي ترى الدنيا ما تسوى بالنهاية سووا هالشي عشان يطلعون زي الشعرة من العجين

اقصوصه
شكرا وانت بخير وصحه وسلامه
وعساكم من عواده

k-alanzi

اوافقج الراي تماما
شنسوي بعد
عيزنا واحنا نتحلطم
نبي احد يتصرف
بس ماكو!!

reemas

لو نتخلص من هالسطحيه على قولتك جان احنا بخير
بس هالديناصورات مو راضين يتقاعدون
عقليات متخلفه مالت ستين سنه ورا


عموما خلنا نرتاح هاليومين ونشوف شبيهببون فينا هالسنه

ايامك سعيده وعساك من عواده

بوشه كتابتج روعــــــــــــــه واسلوبج سدحني بالارض من الضحك.

انتي مدرسة لغة عربيه ؟ كتابتج بالفصحى جدا راقية وسلسه ومافيها تكلف، ماشاء الله عليج.

وعلى سالفة الندوة ، هذا شغل الوزارات، دائما وأبدا مش ولا بد. اهم شي انتي الحين عرفتي شلون تغسلين ايدج ؟

Mish
شكرا عالمشاركه تسلم والله حدك ونستني وسعيده ان البوست عجبك :))

انا معلمة لغة انجليزية


ليلحين قاعده اتعلم اغسل ايدي لول

ههههههه اتمنى اني اقدر اساعدج بهالموضوع

عسى الله يوفقج في بناء الأجيال ودايما خلينا وياج في كتاباتج ومتعينا =)

Post a Comment