مقارنه بين المعلم الكويتي والأجنبي  

Posted by: Chaotic pOsha



كان عندي فضول من زمان ان ودي أعرف اكثر عن نظام التدريس في الدول الثانيه وحاولت كذا مره أدور بقوقل بس مالقيت شي يشبع فضولي!
عشان جذي قررت أني اسأل مجموعه من المعلمين في بعض دول العالم مثل تركيا وكندا والأرجنتين والبرازيل و أسبانيا و روسيا والمغرب ولبنان والإمارات و غيرهم كثير عن طريق سايت مخصص للمعلمين توني صايره عضوه فيه

اللي صار إني سألتهم وحصلت على معلومات ممكن لو نطبق بعضها هني تفيد المعلم وتحببه بالتدريس خصوصا أن كل من صار مدرس هالأيام قعدله سنتين وانحاش من التربيه

لما ييت أقارن بين نظامنا ونظامهم في معاملة المعلم بشكل عام لقيت إن

أولا: معظم المعلمين يدرسون ما بين 25 إلى 30 ساعه بالإسبوع يعني تقريبا خمس ساعات باليوم وفي بعضهم يدرسون 12 ساعه باليوم. احنا بالكويت ندرس ساعتين إلى ثلاث ساعات باليوم وباجي اليوم قاعدين نتريق لول (غشمره). يعني أفهم أن المدرس هناك مكرس وقته وجهده للتدريس وجاد بشغله على الرغم من أن معظمهم يقولون أن معاشاتهم قليله بس اهمه حابين شغلهم. عكس اهني الأغلبيه يايين عشان المعاش ونادرا ما تلقى مدرس حاب التدريس! 24 ساعه تحلطم.

ثانيا: معدل عدد الطلبه في فصولهم حوالي 25 يعني مثلنا تقريبا. ماعدا الأرجنتين 15 طالب بالفصل واسرائيل 40 طالب بالفصل!! وأنا اقول لو نصير مثل الأرجنتين وايد أحسن :)

ثالثا: في تشابه كبير بينا وبين السعوديه من حيث عدد المراحل. يعني كل معلم يدرس مرحله أو مرحلتين بالكثير ماعدا في حالات النقص يقوم المعلم بتدريس ثلاث مراحل. بس في دول ثانيه مثل البرازيل و مقدونيا وكندا والمغرب وتركيا وغيرهم يدرسون أكثر من ماده في نفس الوقت مثلا علوم وانجليزي نفس ما اهني مسوين بمشروع مدارس المستقبل.

رابعا: بالنسبه للتحضير للدروس فمعظم الدول خصوصا الأجنبيه يقومون بوضع خطه شهريه شاملة ولا يقومون بالتحضير اليومي اللي ماله معنى هني عندنا لأن بالنسبه لي هذا اجراء شكلي ويضيع جهد ووقت. ما أقول ان كل واحد يألف منهج على كيفه بس ان في دليل معلم متاح متى ما احتاجله المعلم. هني اللي مايحضر يعني مسوي جريمه!! هذا دليل على عدم ثقتهم بمستوى المعلم على الرغم من أن في بعض المعلمين يحضرون يوميا و مايدرون شنو كتبو التحضير اليومي عباره عن كوبي بيست من دليل المعلم وما أدري شالعبره من الموضوع.

خامسا: ومن أهم النقاط اللي اكتشفتها من خلال أسئلتي أن معظم الدول يقوم فيها المعلم بإعطاء حصصه اليوميه والذهاب للبيت أو الحضور على موعد الحصص أما هني فحتى لو عندي فرضا أول حصتين مادري ليش انا ملزومه اقعد ليما الساعه 1 وثلث أو لو عندي أخر حصتين ليش أيي من الصبح! هذا دليل على أن يبونا نكون أكثر من مجرد معلمين على حسب تفسيري وأفضل إني ما أقارن وزارة التربيه مع أي وزاره ثانيه لان احنا حاله خاصه.

سادسا: سألت المعلمين إذا كانو يقومون بأعمال إداريه غير التدريس مثل المناوبه أو الإشراف أو المقصف إلخ.. واكتشفت ان الدول العربيه اهي اللي تستخدم المعلم كمدرس و كإداري بنفس الوقت يعني مكدشينا أما الدول الأجنبيه فمعظمهم مدرسين فقط و إذا كان عندهم مراقبه فتكون شهريه مو اسبوعيه (ياحظهم)

هذا بالإضافه إلى عدة أسئلة أخرى بس أنا حبيت أذكر أهم النقاط

واللي لفت نظري معلم إماراتي يقول أن الوضع التعليمي بالكويت مشابه للوضع التعليمي بالإمارات ولكن الحكومه عندهم قاعده تغير وايد أشياء عن طريق مشروع (الغد) واللي أهم أهدافه أن يقومون باستبدال الهيئه الإدارية بمتمرسين وخبراء أجانب يطبقون نظام التدريس المستخدم في بريطانيا حاليا

تستاهلون دام في ناس تفكر وتغير وتطمح للأحسن والفال لنا



This entry was posted on Sunday, April 19, 2009 . You can leave a response and follow any responses to this entry through the Subscribe to: Post Comments (Atom) .

4 comments

النظام التعليمي يبيله نفضه من المعلم الى و المنهج و التلميذ و طبعا طبعا الادارة
بس بغيت اسالك فعلا
و سؤالي هذا عارف اجابته ولكن علشان القارئ يعرف
انتي تطرقتي الى خاصية المعاش
المدرس كم يدفع من جيبه حق التدريس

إي والله صاج يبيله هدام وبنيان بعد

بالنسبه للي قاعده اشوفه جدامي
في تفاوت بين كل مدرس وشكثر يدفع بس المعظم يدفعون كثر الكادر وفوق

يعني نحمد ربنا ونشكره ان احنا الوزاره موفره لنا مكتب معاه كرسي بعد يعني كشخه

يبا أوراق مافي
أقلام مافي
مسجلات مافي
قرطاسيه زيرو
كمبيوتر نشتغل عليه ماكو
طابعات تصوير ماكو

إذا الطلبه نفسهم قاعدين يدفعون رسوم تكريمهم!!! تخيل ان يطلبون منهم فلوس عشان يكرمونهم بالتفوق

لا يغركم كادرنا ترا كله بالهوا

بس هم أقول الشرهه علينا احنا لو نوقف وقفه وحده ونتصدى حق هالشي جان ممكن نعدل بس لا من جمعيه معلمين تسوي شي ولا من معلمين نفسهم يهتمون
كل واحد ومصلحته

على فكره ميزانيه قسم اللغه الانجليزيه 50 دينار بالسنه لول ومايعطونياها كاش لازم نروح نشتري اللي نبيه ونييب الفاتوره

اعيد و اكرر
50 دينار بالسنه
وليس خطأ مطبعي لول
مقسم على 6 معلمات! همممممممم
بس بس ارتفع ضغطي لازم أروح

:)))

انا اختي مدرسة
فدايما اشوفها شايله قشها و تصوير و عمل مطبوعات و ما ادري شنو
يعني مبلغ و قدره شهريا
و انصدمت لما شفت تصاميم وطنية قديمة مسويها علىمطبوعاتهم قلت لها يوبا هذا شغلي شكو ومنو اللي سوى و قاعد يسويلكم اياها غلاف
اصدمتني لما قالت انهم ياخذون منهم مبلغ محترم على هالاشياء اللي قاعد اسويها ببلاش علىالنت
قلت يوبا انا اسويلكم اياها و انتم عليكم طباعة هافي ديوتي و بعدين لما فكرت فيها قلت يوبا انا شنو لي بدوخة الراس
الله يعينكم الله يعينكم

يا كثر المدرسات بهالديره وياكثر مايتحلطمون وانا اولهم :p

اي احنا بتاع كله
كل شي نسوي
نصمم نطبع نلصق نزين نكتب نلون نرسم
لو فاتحتلي مكتب طباعه احسنلي

Post a Comment